Nach der Robin Hood Challenge vom 28. September ist im präsidialen Postfach ein Brief vom Namensgebers des Anlasses eingetroffen:
Hoi liäbi Naturfründä, ich bis, üchä Robin.
Ich wott üch nu churz ä Rückblick zur 5. Usfüährig vo dr Robin Hood Challenge machä.
Au das Jahr hend sich wieder 13 tapferi Chriäger nid la abhaltä, der langi und beschwährlichi Wäg, durch dunkli Wälder, tüfi Täler und gfährlichi Strassä uf sich ds näh, um sich uf dr heiligä Wiesä vorem Julo ds dueliärä um Ruhm und Ehre. Au das Jahr hend sich d Spielmacher wieder ä chlini Änderig vorgnuh, um dr Wettkampf interessanter ds gschtaltä. Näbscht em Altbewärtä wiä Chneblä, Axtwärfä, Blasrohr und Pfielbogäschiässä, hemmer das Jahr au zum erschtä Mal Luftgwehr schiässä am Start gha.
Damit miär d Spannig hoch hend chönnä bhaltä, hemmer üs i 2 Teams ufteilt. Wieder eisch isch bis zum letschtä Wurf nid klar gsi, wer dass Hüür dä begehrti Pokal darf heinäh. Aber äbä, äs isch wiä diä letschtä 4 Usträgigä usächo, am Schluss hed sich halt wieder mini Wehnigkeit, Sir Robin Suter durägsetzt.
Zum Abschluss hemmer üs am Lagerfüür nu äs feins Ässä zuäbereitet und dr glungnigi Alass mit Hopfä und Malz und chli Mineral la usklingä.
So das ischs gsi.
Bis zum nächschtä Jahr wieder, in Liäbi, üchä Robin